Faahfaahinta qaraxii kadhacay Magaaladda Jigjiga.

Jigjiga, August 16, 2007 (SG) - Qarax weyn ayaa xalay goor ay saacaddu tahay abbaaro 9:30 fiidnimo waxa uu ka dhacay albaabka geerash ku yaalla xaafadda shanaad ee magaalada Jigjiga.

Qaraxan ayaan wax waxyeello ah gaysan iyada oo aanay xilligaasi wax dad ahi ka agdhawayn agagaarka meesha uu ka dhacay. Bambka qarxay ayaa waxaa la hoos dhigay sagxadda baabuur duug ah oo yaallay albaabka geerashka. Bamka ayaa dhulka hoos u jaray qiyaastii 25cm wuxuu isla markaana firidhyadiisu xoqeen darbiga geerashka oo dhagax ka samaysnaa.

Geerashka uu bamkani ka qarxay ayaa waxa uu u dhexeeyaa Hotel Roman iyo Xarunta Laanqayrta Cas ee Itoobiya. Agagaarka goobta uu ka dhacay qaraxani ayaa ah meel ay aad u daggan yihiin dadka Xabashida ahi.

Dumar badan oo Axmaaro ah oo ku shirsan meesha uu ka dhacay qaraxani ayaa saaka markii aan u tagnay waxa ay iyaga oo luuqaddooda ku hadlaya yidhaahdeen "Ilaahay ayaa na badbaadiyay balse waxaa naloogu talo galay inaan waxba naga hadhin". Midkale ayaa iyana tidhi, "Qarax yadan markasta ka dhaca meelaha ay Axmaaradu u badan tahay waa mid muujinaysa in si weyn nalooga soo horjeedo isla markaana annaga dhimasho nalala maagganyahay".

war dagdag ah: Qarax caawa kadhacay magaaladda Jigjiga.
Qarax weyn ayaa caawa ka dhacay magaalada Jigjiga ee Xarunta Soomaaligalbeed. Qaraxan ayaa waxa uu dhacay abbaaro 9:30 saacadda Afrikada Bari. Qaraxa ayaa waxa uu ku beegan yahay xaafadda 5aad ee magaalada Jigjiga balse si dhab ah looma oga meesha uu ka dhacay ilaa iyo imika.
Dadka ayaa guryahooda ku yaacaya si ay hore ugu hoydaan oo aanay la kulmin gacanta kulul ee Booliiska federaalka. Booliiska Federaalka ayaa lagu yaqaannaa inay dad badan xidhxidhaan wakhtiyada sidan oo kale qaraxyo dhacaan.

Wararka faahfaahsan ee ku saabsan qaraxan waxaan idiin soo gudbin doonaa xilliga ay nasoogaadhaan haddii Alle yidhaa

Bayaankii ka soo baxay Shirweynaha Xoreynta iyo Dib U Soo Nooleynta Soomaaliya gabo gabadiisii.

Gabo gabadii Shirweynaha Xoreynta iyo Dib U Soo Nooleynta Soomaaliya ayaa waxa laga soo Saaray Bayaan ka kooban 14 qodon waxaana lagu sheegay Bayaankaas oo Carabi ku qornaa Qodobo ay ka mid yihiin:-

1) Soomaaliya waxa ay noqotay meel uu cadow uu maalgalinayo Maraykanku ka ugaarsado, isla markaana ay fulinayaan Ciidamada Gumeysiga Itoobiya, oo ku tuntay Karaamadii iyo Isla Weynidii Shacabka Soomaaliyeed ee Muslimka ah, Ciidamada Gumeysiga Itoobiya waxa ay Danbiyo aan la soo koobi karin ka galeen Shacabkayaga, waxay bur buriyeen Caasimadayadii, waxay Barakiciyeen kumaankun Muwaadin oo aan waxba galabsan.

2) Yoolkayaga koowaad isla markaana ah muhimadayada deg dega ee qof waliba oo Soomaaliyeed ee maanta waa ka Xoreynta Wadanka Gumeysiga ku soo duulay, Xoogaga Muqaawamada ee la dagaalamaya Gumeysiga waa Xaqa Sharciga ah ee lama taabtaanka Shacabkayaga, sidoo kale waa Waajib Wadan, mid Diini oo saaran qof waliba oo Muwaadin Soomaaliyeed ah.

3) Isbahaysiga isaga oo fiirinaya Muhimada ugu horeysa ee Xoreynta Soomaaliya, waxa uu sida ugu dhaqsiyaha badani u bilaabayaa Siyaasad uu dib ugu soo Celinayo Dhismaha Wadanka,….dhamaan ka qeyb galayaasha Shirweynaha ujeedadoodu waa in ay xaliyaan dhamaan Qadiyadaha iyo dhibaatooyinka ku xiran Xoreynta Wadanka Soomaaliya iyo dib u soo celinta Aas Aaskii Dowladnimo iyo Mu’asasaadkeedii.

4) Isbahaysiga Xoreynta iyo Dib U Soo Noolaynta Soomaaliya lama galayo wax wado hadal ah waxa loogu yeeray DFKMG inta ay Ciidamada Gumeysiga Itoobiya si buuxda uga wada bixin gudaha Soomaaliya.

5) Isbahaysiga Xoreynta iyo Dib U Soo Noolaynta Soomaaliya waxa uu Codsanayaa in ay Ciidamada Uganda ka baxaan Wadankayaga, sababtoo ah joogitaankoodu ma aha mid Sharci ah, waxaana ay hadda noqdeen qeyb ka mid ah Gumeysiga, sidoo kale Isbahaysigu waxa uu adkaynayaa in joogitaanka ciidan waliba oo Shisheeye nooc kastaba Afrikaan iyo ku kalaba, xaaladkastaba ha ku yimaadaane ay waajib tahay in si wado jir ah la iskaga xoreeyo.

6) Isbahaysigu waxa uu ka codsanayaa Xukuumada Kenya in ay joojiso garabsiinta Gumeysiga Itoobiya, Joojisana Xarig aan Sharciga ahayn…, kana waantowdo Dhoofinta Dadka Soomaaliyeed ee aan waxba ka galabsan.

Bayaankan oo ka koobnaa 14 qodob ayaa qeybtiisii ugu horeysay goordhaw na soo gaartay inta dhimana dib ayaan idinkaga soo gudbinaynaa khadka oo xun owgii.

Weerar xoogan oo caawa lagu qaaday Ciidamada degan Isgoysyada Aadan Cadde iyo midka Howl-Wadaag ee M/Muqdisho.

Abaarihii 11:25 ilaa 11:40 fiidnimo ee caawa ayaa waxa uu dagaal xoogani ka bilowday inta u dhaxaysa Isgoyska Aadan Cadde iyo midka Howl-Wadaag ee Magaalada Muqdisho.

Dagaalkan ayaa markii hore ka bilowday agagaarka Isgoyska Aadan Cadde ka dibna ku faafay ilaa iyo Isgoyska Howl-Wadaag ee Magaalada Muqdisho.

Dagaalkan ayaa la isku adeegsaday Qoryaha Garbaha laga rido ee Sabanada ah, Dhashiikayaal, Qoryaha kale ee daran dooriga u dhaca iyo waliba waxyaabaha kale ee Qarxa intaba.

Lama sheegi karo ilaa iyo hadda khasaaraha dhabta ah ee caawa soo gaaray Ciidamada DFKMG ah ee la shaqeysa gumeysiga itoobiya ee deganaa labada Isgoys ee Aadan Cadde iyo midka Howl-Wadaag.

Waa habeenkii labaad oo weerar xoogani lagu soo qaado ciidamadan soo degay Isgoyska Aadan Cadde Bishan gudaheeda, waxaana uu noqonayaa sidoo kale weerarkii 24 gudaheed lagu qaado oo uu ugu dambeeyay weeraradii bambaano ee saaka barqadii lagu soo qaaday kaas oo aan la garan karin khasaaraha dhabta ah ee soo gaaray.

Ciidamadan ayaa isgoyska Aadan Cadde soo dagay ka dib markii bilowgii Bishan weeraro Hoobiyayaal oo dhowr iyo Toban gaaraya lagu qaaday Madaxtooyada Villa Soomaaliya taas oo la sheegay in qaar ka mid ah oo lala helay ay geysteen khasaarooyin laxaad leh.

Weerarkan ayaa noqonaya weerarkii labaad ee dhaca Bishan Ramadaan ee Barakaysan waxaana kan ka horeeyaya midkii ay Xoogaga Muqaawamadu ku qaadeen fariisimha kala ah:-
1) Warshadii hore ee Barfuunka
2) Warshadii hore ee Baastada
3) Shaneemo C/Waayeel

Kaas oo ay xoogaga ku gubeen baabuur kuwo kalana ay ku qabsadeen isla markaana sababay in ay ciidamadii deganaa ka guuraan saaka aroornimadii hore.

Xoogaga muqaawamada ayaa iyagu Bishan iyo tii ka horeysay ilaa iyo hadda waxa ay si dar dar leh ku wadaan Weerarada iyo Qaraxyada ay la beegsanayaan Ciidamada Gumeysiga Itoobiya iyo kuwa DFKMG ah ee la shaqeysa gumeysiga Itoobiya.

Back