Ibahaysiga dib uxoraynta Dalka Soomaliya oo war saxaafadeed kasoo saaray xaaladda dalku marayo iyo gubashadii suuqa Bakaaraha.

I. Gubidda Suuqa Bakaaraha iyo is hortaaga dadaalkii wax looga qaban lahaa falkaas cadawnimada ah waa qeyb ka mid ah falalka foosha xun ee shacbiga soomaaliyeed lagula dagaalamayo noloshiisa iyo jiritaankiisa ee sida joogtada ah ay u fulinayaan ciidamada gumeysiga Ethoipia iyo dabadhilifyadooda .

Ceeb kuma aha kuwii dadka guryaha ku dumiyey , hantidoodana boobay, maatidiina barakiciyey dabdeedna ka hor istaagay biyo iyo baadba in la gaarsiiyo inay maanta dab geliyaan suuqii Bakaaraha ee ugu weynaa ganacsiga Soomaaliyeed si loo xididdo calaamadaha nolosha ee ka jiri kara caasimadda iyo dalka intiisa kale, dhidibadana loogu aaso joogitaanka gumeysiga ee dalka Soomaaliyeed.

II. Ciidamada Ethiopia ee dalka lagu soo daadgureynayo, iyo kala wareegidda hubka maleeshiyaadkii dabadhilifka u ahaa, iyo qorshaha ciidamda Ethiopia ku qabsanayaan goobo xasaasi ah oo caasimada ka mid ah iyo isu diyaarinta xooga leh ee ay ku doonayaan inay safka hore isi soo dhigaan, waa marxaladii xigtay ee lagu doonayo in dib loogu gumaado intii ka badbaaday xasuuqii lagula kacay shacabka soomaaliyeed horaantii qabsashada dalka.

Mar haddii uu arrinku sidaas yahayna micno ay leedahay ma garanynayno joogitaanka ciidamo lagu sheego in loo keenay ilaalinta nabadda sida kuwa Uganda ee hadda muqdisho ku sugan, waana markhaati ma doonto fashilka kuwii ku andacoonayey inay dalka wax ka yihiin

III. Isbahaysigu isagoo ka duulaya xaqaa'iqdaasi jirta waxa uu ka digayaa cawaaqib xumada ka dhalan karta baabi'inta iyo xasuuqa lala damacsan yahay mar kale in loo geysto shacbiga Soomaaliyeed iyadoo aan wax la iska weydiinin kuwii hore u dhacay iyo kuwa haatan taaganba.

IV. Isbahaysigu waxa uu ugu baaqayaa dalalka caalamka ee nabadda jecel, ururada goboleed iyo kuwa dawliga ah inay gutaan masuuliyadda ka saaran badbaadinta shacbka Soomaaliyeed ee lagu gumaadayo aaladda cadawga dalka ku soo duulay ee ka madax adeygay in uu dhawro dhamman sharuucda caalamka ee madax banaanida iyo dhawridda xaquuqda aadanaha.

V. Isbahaysigu waxa uu sidoo kale ku boorinayaa bulshada Soomaalieed qeybaheeda kala duwan inay iscaawiyaan una gargaaraan walaalahooda tabaaleysan. Sidoo kale waxa uu ugu baaqayaa hay'adaha samafalka ee goboleed iyo kuwa dawliga ahba inay taakuleeyaan shacabka soomaaliyeed ee sida joogtada ah loogala dagaalamayo nolosha iyo jiritaanka.

VI. Isbahaysiga waxa uu bulshada Soomaaliyeed uga digayaa colaadaha sida qorsheysan looga dhex hurinayo ee ay ka dambeeyaan ciidamada Ethiopia iyo dabadhilifyadooda kuwaas oo ujeedada ka dambeysa ay tahay in indhaha caalamka lagaga sii jeediyo dambiyada lagula kacayo shacabka Soomaaliyeed. Wuxuuna Isbahaysigu Culumaa'udiinka, Ugaasyada, Boqorada, iyo Odayaasha dhaqanka ugu baaqayaa inay kaalintoodii hormuudnimo ka qaataan daminta colaadahaas, bulshadana uga digaan colaadda iyo dagaalada sokeeye kuwaas oo cidda keliya ee ka faa'iideysa ay tahay cadwga soo jireenka ah ee ummadda Soomaaliyeed.

VII. Ugu dambeyntii Isbahaysigu wuxuu bulshada Soomaaliyeed ugu yeerayaa inay midnimadooda adkeeyaan, cadawga ku soo duulayna meel uga soo wada jeestaan naf iyo maalna uga qeybqaataan muqaawamada barakeysan si ay u difaadaan diintooda, dadkooda iyo dalkoodaba.

Dabkii xalay kakacay suuqa weyn ee Bakaaraha oo khasaare xoogle u gaystay Suuqaas iyo hantidii shacaka Soomaaliyeed.

Suuqa Bakaaraha oo ah suuqa ugu weyn dalka Soomaaliya, ayuu xalay dab qabsaday dabkan ayaa qabsaday qaybaha isku raranta ah ee suuqa dharka kaasoo markii dambana ku faafay qaybaha kale ee suuqa sida qaybta Maktabadaha kutubta lagu iibiyo, qaybta loo yaqaano Cabdale Shideeyaha iyo qaybta loo yaqaano suuqa hilibka.

Dabkan ayaa suuqa qabsaday xili uu magaaladda ka dhacay dagaal culus kasoo lagu weeraray ciidamadii daganaa xeradii guul wadayaaasha, dagaalkaas oo la sheegay in aad loogu waxyeelay ciidamadda gumaysiga iyo kuwa daba dhilifka u ah ee la shaqeeya.

dagaalkan kadib ayaa la sheegay in ciidamadda gumaysiga Itoobiya ee dagan Wasaaradii horee Gaashaandhiga Soomaaliya ay madaafiic ku garaaceen qaybi badan oo ka mid ah maagaaladda dad badan ayaa ku qanacsan in ciidamadda gumaysigu madaafiicdii ay ku ridayeen suuqaas oo dabku ka dhashay.

Dabkan ayay ugu dambayn waxay ku guulaysteen Shacabka soomaaliyeed Xalay seq dhexe Inay damiyaan Alle mahadii iyagoon haba yaraatee wax gurmad ah ka helin kuwa daba dhilifka u ah Tigreega, bal iska dhaaf inay usoo gurmadaani waxay jareen wadooyinka suuqa laga soo gali lahaa.

Inkastoon wali tira koob rasmi ah laga hayn hantida ku gubatay suuqaas ayaa waxaa muuqata inay halkaa ku gubatay hanti aad utiro badan xili shacabka Soomaaliyeed laga dayrinayo xaaladiisa noladeed oo ay boqolaal kun oo qays oo ka barakacay caasimadda ay ku noolyihiin dhulka kaymaha ah ee ku hareeraysan Caasimadda iyo gobaladda dalka intaba.

Back