Cudurka shuban biyoodka oo ka dilaacay magaala madaxda gobalka Nogbeed Fiiq, dhulka lagumaysto ee S/galbeed.

Wararka ka imaanaya Magaalada Fiiq ayaa sheegaya in magaaladaas uu ka dillaacay markii u horreysay Cudurka Shuban-biyoodka isla markaana uu faraba'an ku hayo Shacabka ku nool magaaladaas.

Dadka uu Cudurkani ku dhacay ayaa dhammaantood waxaa la jiifiyay Xarumaha Caafimaad ee ku yaal Magaaladaas, Xafiiska Caafimaadka ee Degaanka iyo Hay'ado kale oo u xilsaaran dhinaca Caafimaadka ayaa iska kaashanaya sidii ay wax ugu qaban lahaayeen dadka uu Cudurkani ku dhacay ee deggan magaaladaas.

Sidoo kale waxaa magaaladaas gaadhay gargaar Caafimaad oo ay keentay Hay'adda WHO oo wax looga qabanayo Cudurkan Shuban-biyoodka ah ee magaaladaas ku dhacay, Adeegga Caafimaad ee wax loogu qabanayo dadka uu Cudurkani ku dhacay ayaa sidoo kale waxaa ka qayb qaadanaya Dhakhaatiir sare oo laga kala keenay Caasimadda Jigjiga iyo Addis Ababa.

Kalkaaliyayaal Caafimaad oo tababarkoodu aad usareeyo iyo waliba dad takhasusu u leh Cudurada noocan oo kale ah oo iskood isku xilqaamay ahna dadka gobalaka u dhashay aya hada, waxay dadkani dhammaantood ku sugan yihiin Magaalada Fiiq

Waa markii u horreysay ee Cudurkani lagu arko magaaladaas, iyadoo hadda ka hor uu Cudurkani ka dillaacay dhawr Degmo oo ka tirsan Dhulka Soomaaligalbeed, waxaana bilahan lagu hawlanaa sidii Cudurkaas looga dabar goyn lahaa meelaha uu wali raadkiisu ku laaban yahay ama uu hadda ka dillaacay.

Cudurkan ayaa ka dhasha Nadaafad darro dhinaca Biyaha ah, Magaalada Fiiqna inta badan Biyaha la isticmaalaa waa Biyo Ceel oon la ilaalin karin Nadaafadiisa, tan ayaa keentay in halmar si kadis ah loogu arko magaaladaas Cudurka Shuban-biyoodka.

Sanadkan ayuu cudurkaas dad badani ugu dhinteen dagmooyinka ka tirsan gobalka Nogbeed wakhtigaas oo ayna dadkaasi helin haba yaraatee wax gurmad ah waxayna ciidamadda gumaysiga dhamaanba shaqadii ka joojiyeen Hay adihii ka howlgali jiray gobalkaas

Wariye Cabdi Saalax
Fiiq, Soomaaligalbeed

Back