Sheekh Xasan Turki oo Maanta ku baaqay in la dagaalamo Ciidamada UNISOM iyo Itoobiya.

Sheekh Xasan Turki oo kamid ah mas'uuliyiinta sar sare ee maxkamadaha ayaa maanta ku baaqay dagaal ka dhan ah ciidamada ka socda Qaramada Midoobay ee la filaayo in ay dalka yimaadaan sida lagu sheegay bayaan uu golaha amaanka ka soo saaray xaaladda dalka Soomaaliya.

Sheekh Xasan Turki ayaa wacad ku maray in ay dagaal la galayaan ciidamada Qaramada Midoobay haddiiba ay yimaadaan Soomaaliya, isagoo sheegay in shacabka Soomaaliyeed ay tahay in ay la dagaalamaan ciidamadaas.

"Meel kasta iyo goob kasta waan ku dagaalameynaa ciidamadaas, waxaanu u aragnaa in ay qeyb yihiin isticmaarka gaaladu ku heyso Soomaaliya, taasna ma ahan mid aanu indhaha ka laabaneyno" ayuu yiri sheekh Xasan turki.

Wuxuu sheegay in ay sii wadayaan dagaalka ay kula jiraan ciidamada gumeysiga Ethiopia ee ku sugan gudaha dalka Soomaaliya, isagoo sheega in shacabka Soomaalida ah ay horey ugu guuleysteen dagaallo dhowr ah oo ay galeen gaar ahaan kii ciidamada UNISOM.

Wuxuu ku tilmaamay waxba kama jiraan shirka dib u heshiisiinta ee lagu dhexdhexaadinaayo mucaradka iyo dowladda KMG, isagoo shaaca ka qaaday in xiligaan aanuba jirin wax shir ah oo ay tahay in dalka laga xoreeyo ciidamada gumeysiga Ethiopia.

"Anigu waxaan kamid ahay cidkasta oo cadowga dagaalka kula jirta, kuwaas ayaanu ehel nahay oo aan kamid ahay" ayuu yiri Sheekh Xasan Turki oo ka hadlayey cidda uu isagu urur ahaan kamid yahay.

Sheekh Xasan Turki ayaa ah shaqsi mowqif adag leh marka loo eego xubnaha mucaaradka, waxaana lagu tilmaamaa in uu kamid yahay shaqsiyaadka ad adag ee ku jira mucaaradka ka horjeeda siyaasadda dowladda iyo joogitaanka ciidamada gumeysiga Ethiopia.

Sheekh Shariif Sheekh Axmed oo a ka dhawaajiyey in dowladda Eretrea ay wado qorshe ay ku kala Jabinayso Isbeheysiga.

Guddoomiyaha golaha fulinta isbeheysiga dib u xoreynta Soomaaliya Sheekh Shariif Sheekh Axmed ayaa ka dhawaajiyey in dowladda Eretrea ay wado qorshe ay ku kala dhantaaleyso isbeheysiga dib u xoreynta ee fadhigiisu yahay magaalada Asmara.

Hadalkaan oo uu sheekhu ka sheegay kadib shir jaraa'id oo uu ku qabtay magaalada Jabuuti ee xarunta dalka Jabuuti ayuu ku sheega in dowladda Eretrea uu ku amaanayo dadaalo ay horey u sameysay, hase ahaatee iminka ay wado qorshey ay ku kala jabineyso isbeheysiga dib u xoreynta Soomaaliya.

"Waxaan ugu baaqayaa madaxda dalka Eretrea in ay joojiyaan qorshaha ay ku kala dhantaalayaan xubnaha isbeheysiga dib u xoreynta, waayo xiligaan waxaa loo baahan yahay in Eretrea ay qeyb ka qaadato dadaalada dib u heshiisiinta" ayuu yiri Sheekh shariif Sheekh Axmed.

Wuxuu intaas raaciyey in uu aad uga xun yahay in xubno ka tirsan isbeheysiga ay warbaahinta ka sheegaan hadalo niyad jab ku abuuraya shacabka Soomaaliyeed, isagoo tilmaamay in loo baahan yahay in xubnahaas ay dib uga fiirsadaan hadalada keeni kara in dalka uu ku sii jiro fowdada iyo burburka.

Wuxuu sidoo kale sheegay in uu bogaadinayo dadaalada ay beesha caalamka ugu jiraan arrimaha dalka Soomaaliya islamarkaana ay tahay in ay dhinacyada Soomaalida dhamaantood ka qeyb qaataan dadaaladaas.

Hadalka Sheekh Shariif Sheekh Axmed oo u muuqday mid jawaab u ah hadalo ay dhawaanahaan xubno ka tirsan isbeheysiga Asmara ay ka jeedinayeen warbaahinta ayaa wuxuu sidoo kale ku soo beegmayaa xilli khilaafaad xooggan uu hareeyey isbeheysiga dib u xoreynta Soomaaliya ee xaruntiisu tahay magaalada Asmara.

Inka badan 50 Soomaali tahriib ah oo Ku dhintay Badda u dhexeysa Dalalka Talyaaniga iyo Liibiya.

Inka badan 50 Soomaali tahriib ah ayaa ku dhintay badda u dhexeysa dalalka Talyaaniga iyo Liibiya kadib markii ay la qalibmatay dooni ay si tahriib ah ugu galayeen xeebaha dalka Talyaniga.

Dadka geeriyooday ayaa la sheegay in ay markii hore ka soo amba bexeen xeebaha dalka Liibiya oo ay doon ka soo raaceen laakiin ay doontii ay saarnaayeen kula ciiray badda u dhexeysa dalalka Talyaaniga iyo Liibiya.

Wararka laga helayo dalka Talyaaniga ayaa sheegaya in ciidamada badda Talyaaniga ay isbuuc ka hor badbaadiyeen Soomaali Tahriib ah oo la sheegay in ay doon ka soo raaceen xeebaha dalka Liibiya kuwaas oo la sheegay in ay 6 kamid ah ay ku geeriyoodeen badda.

Dhinaca kalena dadka Soomaalida ah ee sida tahriibka ku galaya dalka Talyaaniga iyagoo sii maraya badda u dhexeysa dalalka Talyaaniga iyo Liibiya ayaa sii kordhaya, waxaana warar laga helay xeebaha dalka Liibya ay sheegayaan in dad badan oo Soomaali ah oo doonaya in ay ka talaabaan badda u dhexeysa Liibiya iyo Talyaaniga ay ku sugan yihiin xeebaha dalka Liibiya.

Soomaalida tahriibka ah ee doonaya in ay helaan nolol ka fiican midda ay kaga soo tageen dalka Soomaaliya ayaa badanaa ku geeriyooda badda, iyadoo meelaha ugu badan ay dadka Soomaalida ah ku dhintaan ay kamid yihiin badda u dhexeysa dalalka Yaman iyo Soomaaliya iy midda u dhexeysa dalalka Talyaaniga iyo Liibiya.

Qaar kamid ah Xildhibaanadda DF ee Kusugnaa Magalada Muqdisho oo ay Ciidamada Gumaysiga Itoobiya xabsiga Dhigeen.

Seddax kamid ah xubnaha barlamaanka Soomaaliya ayey ciidamada Ethiopia ee fariisinka ku leh xaruntii hore ee Asluubta waxa ay dhigeen xabsiga kadib markii iyaga oo ku sii jeeda magaalada Beydhabo ay ka qabteen meel ku dhow xarunta Asluubta.

Mid kamid ah xubnaha seddaxda ah ee la xiray ayaa warbaahinta u sheegay in ciidamada Ethiopia ay qabteen deetana ay xireen, isagoo intaa raaciyeey in ilaaladii la socotay ay ciidamada Ethiopia qoryihii ka qaateen islamarkaana ay xireen.

Xildhibaan Ismaaciil Xasan Jaamac oo ka mid ah xildhibaanada la xiray ayaa sheegay in xubnaha kale ee lala xiray ay kala yihiin xildhibaan Cabdi Xaaji Ereg iyo xildhibaan Cali Cismaan Jiidow.

Mar la weydiiyey in ay ka war hayaan sababta ay ciidamada Ethiopia u xireen ayuu sheegay inaanu ogeyn sabab loo xiro, isaoo intaa raaciyey in xitaa ay tuseen aqoonsigooda xildhibaanim hase ahaatee ay madax adeegeen.

Waa markii ugu horeysay oo ay ciidamada Ethiopia xabsiga dhigaan xubno ku jira barlamaanka dowladda Soomaaliya iyadoo tani ay muujineyso in ciidamada Ethiopia ay awood u leeyihiin in ciddii ay doonaan xabsiga dhigaan.

Ciidamada Ethiopia oo Fariisin ka Samaystay dDeegaanka Yaaqbari Weyne ee Gobolka Sh/hoose.

Ciidamada Ethiopia ayaa fariisin ka dhigtay deegaanka Yaaqbari weyne ee gobolka Sh/hoose halkaas oo weeraro iyo qaraxyo dhowr mar ciidamada Ethiopia lagula beegsaday.

Ciidamada Ethiopianka ah ee fariisinka ka dhigtay deegaanka Yaaqbari weyne ayaa la sheegay in ay ka yimaadeen dhinaca gobolka Bay, waxaana dadka ku dhaqan deegaankaas ay sheegeen in ay wataan gaadiidka dagaalka oo aan tiradooda la sheegin.

Wararka laga helayo deegaanada ku dow deegaanka Yaaqbari weyne ayaa sheegaya in ciidamada Ethiopia ay halkaas ka bilaabeen dhaqdhaqaaqyo ciidan, lamana oga ujeedada ka dambeysa in ciidamada Ethiopia ay halkaas ka bilaabaan dhaqdhaqaaqyo.

Waxaa la sheegay in dadkii ku dhaqnaa deegaanka ay gebi ahaanba isaga carareen deegaankii ay deganaayeen iyagoo ka cabsi qaba in ay waxyeelo kala kulmaan ciidamada Ethiopianka ah ee deegaankaas fariisinka ka dhigtay.

Dhinaca kalena ciidamo Ethiopianka ah ee ku sugan gobolka Hiiraan ayaa la sheegay in ay halkaas ka bilaabeen baaritaano aan weli la ogen in ay dad ku qabqateen.

Ciidamada Ethiopia ayaa wararku sheegayaan in ay si aad u adkeynayaan amaanka magaalada Baledweyne gaar ahaan xarumaha maamulka gobolka Hiiraan tan iyo markii uu maamulka cusub gaaray gobolka Hiiraan.

Ilma Yar oo 7sano jira ah oo u geeriyooday Qaniinyo Eey iyo Hooyadii oo Uwaalatay.

Ilmo yar oo da'diisu ahayd 7 jir ayaa waxaa uu u geeryooday qaniinyo Eey, ilmahan yar ayaa waxay reerkoodu degganaayeen xaafadda 7aad ee magaalada Jigjiga.
Hooyada dhashay Ilmahan ayaa markiiba waalatay oo miyirkii ka tagay kaddib markay aragtay Ilmaheedii oo meyd ah.

Sida ay sheegayaan dadkii ay dariska ahaayeen xaafadda uu ilmahan yari ka dhintay, Ayga ayaa Ilmahayar dhawr maalmood ka hor ka qaniinay lugta, balse intii Dhakhtar la geeyay Ilmaha yar wuu iska caafimaaday oo waa uu iska socday, qaniinyada Ayga ee ilmahayari uu qaniinay kaddib ayaa qoyskii Ilmaha yar dhalay waxay ka diiwaangaliyeen Booliska iyagoo u sheegay haddii Ilmahan yari wax u noqdo qaniinyada Aygaas masuuliyadeeda qaadayso qoladii iska lahayd Ayga oo Xabashi ah.

Haddaba Ilmahan yar ayaa dhintay dhawr iyo toban maalmood kaddib qaniinyadii uu Aygu u gaystay Ilmahaas, isla markii uu Ilmahan yari geeryooday ayaa qoyskii uu ka dhashay Ilmuhu iyo dariskiiba waxay weerar dhagaxaan ah ku qaadeen qoladii lahayd Ayga halkaasna khasaaro badan loo gaystay qoladii Ayga lahayd balse Booliska Degaanka ayaa markiiba soo gaadhay Xaafaddii waxayba Xabsiga u taxaabeen Islaantii lahayd Ayga qaniinay Wiilka yar ee dhintay. arrinku sidaa kuma dhammaanin ee xitaa waxaa lala xidhay Aygeedii.

Waa markii u horeysay ee Ilma yari u dhinto qaniinyo Ay iyadoo dad badan oo Xaafadahaas deggani cabsi weyn ka qaadeen Ayda xaafadahaas, inta badan Xaafadaha Xabshida ayaa waxaa ku badan Ay intooda badani sumaysan tahay oo qofkii ay qaniinaan halis ugu jira inuu u dhinto, Ilmahan yar markii hore ee uu Aygu qaniinay wuu iska caafimaaday oo wax dhibaato ah ma qabin laakiin halmar ayaa lagu soo booday Ilmaha baadhitaan lagu sameeyay Ilmaha yar markuu dhintayna waxaa uu soo saaray in suntii Ayga ay dib ugu soo kacday Ilmaha taasna ay sababtay inuu u geeryoodo.

Ayda sumaysan ayaa intooda badan ku badan magaalada balse intooda badan waa la dilaa kuwa noocaas ah oo dadka Shacabka ah ee u dhawdhaw xaafadahaas ayaa si hoos ahaaneed u dila Ayda noocan oo kale ah.

Cuddoomiyihii Degmada Guriceel iyo Seddax qof oo uu ku jiro oo shalay Maqribkii lugu dhaaway Magaalada Dhuusamareeb.

Seddax qof oo uu ku jiro guddoomiyihii degmada Guriceel ee gobolka Galgaduud ayaa shalay maqribkii kooxo la sheegay in ay ku hubeysnaayeen bastoolado waxa ay ku dhaawaceen magaalada Dhuusamareeb ee xarunta gobolka Galgaduud.

Ragga hubeysan ayaa la sheegay in ay soo beegsadeen goob lagu shaaho oo ay ku ugnaayeen Nabadoon caan ka ah gobolka Galgaduud iyo guddoomiyaha degmada Guriceel iyagoona rasaas ku furay halkaas oo dhaawacyo ay ka soo gaareen seddaxda nin.

Dhaawacyada labo qof oo mid uu yahay guddoomiyaha degmada Guriceel Cali Sheekh oo la sheegay in ay aad halis u ahaayeen ayaa loola soo cararay isbitaalka Istarliin ee degmada Guriceel halkaas oo lagu dabiibayo.

Wararka saakay laga helayo degmada Guriceel ayaa sheegaya in xaaladda caafimaad ee guddoomiyaha degmada Guriceel iyo raggii lala dhaawacay ay ka soo reyneyso islamarkaana iminka ay xoogaa bogsadeen.

Lama oga ujeedada ka dambeysa in kooxo hubeysan ay beegsadaan waxgarad iyo guddoomiyaha degmada Guriceel oo goob wada joogay, hase ahaatee dadka deegaanka ayaa falkaasi ku tilmaamay mid lagu abuurayo qalqal.

Bartamaha isbuucii hore ayey aheyd marrkii sidaan oo kale rag bastoolado ku hubeysnaa ay toogasho ku dileen nin darawal u ahaa hay'adda ICRC ee ka howlgasha gobolka Galgaduud gaar ahaan xarunteeda magaalada Dhuusamareeb.

Ciidamada Guumaysiga Itoobiya oo Baadhitaanno Xoogan Xalay Fiidkii Kasameeyay Qaybo ka mid ah Magaalada Jigjig.

Ciidamada Guumaysiga ayaa baadhitaanno xoog leh waxay xalay fiidkii ka wadeen qaybo ka mid ah magaalada Jigjiga, meelaha ay sida gaarka ah u baadhayeen ayaa waxaa ka mid ahayd agagaarka Wadada hormarta Isbitaalka weyn ee Jigjiga, ka soo horjeedka London Cafe, iyo meelo kale ee ay dadku ku badnaayeen.

Xalay oo Korontadu ka maqnayd magaalada ayaa meelo badan waxaad ku arkaysay Askarta Guumaysiga oo waddooyinka taagan iyagoo wixii Shandad ama bac wax ku sita oo dhan ay baadhayeen isla markaana waydiinayay halka uu ka yimid iyo meesha uu ku socdo.

Haddaba baadhitaannadan ayaa habeenadan dambe isa soo tarayay iyadoo ay maalmo yar ka hadhsan tahay wakhti uu Guumaysigu u dabaaldagayo xilligii uu qabsaday Waddanka, haddaba si ay u yaraadaan waxa uu Guumaysigu ka baqayo inay wakhtigaas dhacaan ayaa waxaa uu joogto ka dhigay inuu Ammaanka magaalada aad u sugo iyadoo waliba toddobaadkan uu adkaaday ammanka magaaladu kaddib markii Askarta Guumaysigu qabqabtaan dadka Shacabka ah ee habeenkii iska dhex socda magaalada.

Walina lama sheegin wax lagu qabqabtay baadhitaannadaas walaw habeen walba ay joogto tahay baadhitaanku laga bilaabo markay cadceeddu dhacdo ilaa 12 habeenimo.

hadba wixii ku soo kordha Ammaanka magaalada Jigjiga iyo guud ahaan Dhulka S/galbeed kala soco Soomaaligalbed.com

Email:Webmastar@soomaaligalbeed.com