Roobab laxaad leh oo Maalmihii ugu Dambaysay ka da'ayay qaybo badan oo ka mid ah Dhulka S/galbeed.

Roobab laxaad leh ayaa maalmihii u dambaysay waxay si toos ah uga da'ayeen qaybo badan oo ka mid ah Dhulka S/galbeed, meelaha ay sida tooska ah uga da'een ayaa waxaa ka mid ahaa, Gobolada Jigjiga iyo nawaaxigeeda, iyadoo magaalada Jigjigana laga bilaabo galabtii ilaa habeen badhkii oo si toos ah uga da'o.

Ilaa iyo hadda ma jiraan wax khasaare ah oo ay gaysteen Roobabkani iyadoo dad badanina ay aad ugu reeyeen Roobasha hadda ka bilowday Degaanka, Waxaad ku arkaysaa meelaha uu roobkani ka da'ay Doog badan oo isla markiiba ka soo baxay banaanada iyo buurihii oo ay ka muuqato cagaar farabadan oo ishu ku raaxaysanayso, dad badan ayaa hadda bilaabay inay beertaan hadhuudhka iyo galayda iyo waxyaabo kaleba si ay uga faa'iidaystaan Roobabkan hadda ka curtay Degaanka.

Haddaba Degaanka ayaa bilihii u dambaysay waxaa si xun u soo food saartay Abaar ay u le'deen dad iyo duunyo badan, iyadoo wakhtigaas meelo badan oo Degaanka ah laga sameeyay Salaado Roob doon ah, balse bishan aynu ku jirto ilaa bishii hore dhexdeedii ayaad moodaysay in xogaa daruuro ay soo hadheynayeen meelo badan oo Degaanka ka mid ah, iyadoo bishan uu aad uga da'ay Roobku dhawr gobol oo uu ka mid yahay Gobolka Jigjiga.

Cabdi Saalax
Soomaaligalbeed Jigjiga

Xoogagga Mujaahidiinta oo Maanta la wareegay Labo gaari oo ay lahaayeen Xubno kamid ah golaha Wasiirada DF.

Xoogagga Mujaahidiinta ayaa maanta la wareegay labo gaari oo ay lahaayeen xubno kamid ah golaha wasiirada dowladda Soomaaliya kadib weerar ka dhacay meel u dhexeysa deegaanada Wanla-weyn iyo Yaaq bariweyne.

Iska horimaad la sheegay in uu dhexmaray ciidamadii la socday gawaarida iyo xoogagga Al-shabaab ayaa waxaa ku naf waayey 4-kamid ahaa ciidamadii la socday gawaarida halka qaar kalena ay ku dhaawacmeen.

Afhayeenka Al-shabaab Sheekh Muqtaar Roobow Cali (Abuu Mansuur) ayaa xaqiijiyey in xoogagga Al-shabaab ay la wareegeen labo gaari oo ay lahaayeen wasiiro ka tirsan dowladda kuwaas oo ay weerar gaadmo ah kula beegsadeen iyagoo ku sii jeeda magaalada Beydhabo ee xarunta gobolka Bay.

Wuxuu sheegay in hal gaari uu ka baxsaday kaas oo u baxsaday dhinaca deegaanka Leego ee gobolka Sh/hoose, isagoo intaa raaciyey in sidoo kale ay qabsadeen qoryo u badan kuwa fudud.

Illaa iyo hadda wax war ah kama soo bixin mas'uuliyiin ka tirsan dowladda gaar ahaan wasiirada la sheegay in ay leeyihiin gawaarida ay maanta qansadeen xoogagga hubeysan ee Al-shabaab oo si weyn uga horjeeda siyaasadda dowladda federaalka ee u adeegta cadowga iyo joogitaanka ciidamada gumeysiga Ethiopia.

Xafiiska wararka Muqdisho

Xoogaga Mujaahidiinta Soomaaliyeed iyo Ciidamada Gumaysiga Itoobiya oo uu iska hor imaad kudhaxmaray..

Iskhor imaad u dhexeeya ciidamada gumeysiga Ethiopia iyo xoogag mujaahidiinta Soomaaliyeead oo wax yar ka hor ka dhacay wadada warshadaha gaar ahaan inta u dhexeysa isgoysyada Towfiiq iyo Carafaad.
Iska horimaadkan ayaa ka dhashay markii ay xoogagga mujaahidiinta weerar ku qaadeen ciidamada cadawga, oo ay qarxiyeen gaari booyad ah oo biyo u dhaamineysay ciidamada gumeysiga Ethiopia oo lala haleelay qori ga Baasuukaha.

Qaraxa booyadda kadib ayaa waxaa halkaas ka dhacay dagaal muddo daqiiqado ah socday, iyadoo hubka noocyadiisa kalan duwan la isku adeegsaday mudadii uu socday dagaalka.

Wararka ayaa sheegaya in iska horimaadku uu ku baahay inta u dhexeysa isgoyska Carafaad illaa warshadda Baastada halkaas oo ay si joogto ah u istcimaalaan ciidamada gumeysiga Ethiopia ee fariisinka ku leh xaruntii hore ee warshaddaBaastada.Si dhab ah looma oga khasaaraha ka dhashay iska horimaadka marka laga reebo qarax lala haleelay gaariga booyadda ahee biyaha u dhaamin jirtay ciidamada gumeysiga Ethiopia ee ku sugan xaruntii hore ee warshadda Baastada.Xaaladda ayaa iminka caadi ah, mana jiro wax iska horimaad ah oo hadda socda, hase ahaatee waxaa la maqlayaa rasaas teel teel ah oo u muuqata in ay ridayaan ciidamada gumeysiga Ethiopia ee ku sugan inta u dhexeysa xaafadda Carafaad illaa warshaddii hore ee Baastada.Xafiiska wararka Muqdisho

Qaar kamid ah Wadooyinka Magaaladda Muqdisho oo saaka xiran

Qeybo kamid ah wadada wadnaha ayaa waxaa saaka xirtay ciidamada dowladda oo ay weheliyaan ciidamo Ethiopian ah kadib dagaal shalay ka dhacay isgoyska Florenza ee xaafadda Xararyaale oo fariisin u ah ciidamo ka tirsan dowladda federaalka.

Gaadiidkii isaga gooshi jiray isgoysyada Sanca illaa Howl-wadaag ayaa gebi ahaanba ah saakay mid aan shaqeynin, waxaana qeybo kamid ah wadada wadnaha saakay lagu arkayaa dadweyne fara badan oo lugeynaya kuwaas oo ay gaadiid la'aantu saameyn balaaran ku yeelatay.

Ciidamada dowladda ee ku sugan isgoyska Xararyaale ayaa guud ahaan xayiray dhaqdhaqaaqii gaadiidka dadweynaha, waxaana ciidamadaas oo ay wehliyaan ciidamo Ethiopian ah ay dhaqdhaqaaq ka wadaan isgoyska Xararyaale oo fariisin u ah.

Warar lagu kalsoon yahay ayaa sheegaya in meydadka dad shalay ku dhintay dagaalkii ka dhacay Xararyaale ay weli yaalaan hareeraha isgoyska Florenza iyo xaafadda Xararyaale, waxaana meydadkaas aan si dhab ah loo ogeyn cidda ay yihiin.

Isgoyska Florenza ayaa shalay waxaa ka dhacay dagaal aad u qaraar oo salfaday nolosha dad ka badan 10 qof halka ay ku dhaawacmeen inka badan 30 qof oo rayid ah, waxaana dadkaas dhaawacyadooda la dhigay isbitaalada Muqdisho.

Si kastaba ha ahaatee isgoyska Florenza ee xaafadda Xararyaale oo ay saldhig ku leeyihiin ciidamada dowladda ayaa xirma marka uu halkaas dagaal xooggan ku dhexmaro ciidamada dowladda iyo kooxaha ka horjeeda, waxaana saameynta ugu badan ay ku yeelataa gaadiidka dadweynaha iyo dadka shacabka ah ee isticmaala wadada wadnaha.

Email:Webmastar@soomaaligalbeed.com